ТРОПАРИ СВЯТЫМ БЛАГОВЕРНЫМ ЦАРЯМ И КНЯЗЬЯМ

Тропарь. Александру Невскому (в схиме Алексию), блгв. вел. Кн.
Яко благочестиваго корене / пречестная отрасль был еси, блаженне Александре, / яви бо тя Христос яко некое Божественное сокровище Российстей земли, / новаго чудотворца преславна и Богоприятна. / И днесь сошедшеся / в память твою верою и любовию, / во псалмех пениих радующеся славим Господа, / давшаго тебе благодать исцелений. / Егоже моли спасти град сей, / и стране нашей Богоугодней быти, / и сыновом Российским спастися.

Величание. Александру Невскому (в схиме Алексию), блгв. вел. Кн.
(на успение блгв. вел. кн. Александра Невского): Величаем тя, / благоверный княже Александре, / и чтим святое успение твое, / и ныне молиши за нас / Христа, Бога нашего.

Тропарь. Андрею Боголюбскому, блгв. вел. Кн.
Яко благоверен и праведен, / за любовь Христа Бога от своих смерть приял еси, / кровь свою пролияв, / яко же прежде сродницы твои и страстотерпцы Борис и Глеб, / ихже кровем совопиет и твоя кровь, святе, к Богу, / якоже Авеля и Захарии праведных, / благоверный страстотерпче, великий княже Андрее, / с нимиже Христа Бога моли о стране нашей, еже Богоугодней быти / и сыновом российским спастися.

Тропарь. Андрею Смоленскому, блгв. Кн.
Блаженство Евангельское возлюбив, / Богомудре княже Андрее, / чистоту сердца девством почтил еси / и, суету мира сего презрев, / устремился еси зрети Бога, / Иже тя прослави чудесы / во врачевании различне страждущих. / Сего ради молим тя: / проси нам у Христа Господа / всяких скорбей избавления / и получение Царства Небеснаго.

Тропарь. Анне Кашинской, блгв. вел. Кн.
Днесь восхваляем тя, преподобная мати, / великая княгине инокине Анно: / яко бо лоза плодовита посреде терния, / процвела еси во граде Кашине твоими добродетельми, / всех удивила еси чуд¬ным твоим житием, / темже Христу Богу угодила еси, / и ныне, радующися и веселящися, / пребываеши с лики преподобных жен, / наслаждающися райския красоты и веселия. / Молим убо тя, моли о нас / Человеколюбца Христа Бога нашего, / даровати нам мир и велию милость.

Тропарь. Анне Новгородской, блгв. Кн.
От запада возсиявши, яко звезда небосветлая, / прияти Православную веру сподобилася еси, / в нейже плод благославный Русской земле принесши, / святая благоверная княгине Анно, / Христа всем сердцем возлюбила еси, / Того оправдания и законы хранящи; / темже днесь всесвятую твою память празднующе, / грехов оставление молитвами твоими приемлем.

Величание. Анне Новгородской, блгв. Кн.
Ублажаем тя, / преподобная мати, великая княгине Анно, / и чтим святую память твою, / наставнице инокиням / и собеседнице Ангелом. собеседнице Ангелом.

Тропарь. Борису и Глебу, во св. Крещении Роману и Давиду, блгвв. кнн., страстотерпцам.
Мученическою кровию порфиру окропивше светло, / украшени предстоите, страдальцы славнии, Царю Безсмертному, / и, венцы славы от Него приимше, / молитеся стране нашей подати на враги одоление / и душам нашим велию милость.

Тропарь. Владимиру Ярославичу Новгородскому, чдтв., блгв. кн.
Измлада явился еси, Богомудре княже Владимире, / Божественный сосуд избран Богови, / благочестием воспитан, веру непорочну соблюл / и, храм пречуден Премудрости Божия в Великом Новеграде сем устроив, / тело Твое в Нем предложил еси, / и ныне, на Небесех предстоя Престолу Святыя Троицы, / молися ниспослати и нам велию и богатую милость.

Тропарь. Всеволоду, в св. Крещении Гавриилу, Псковскому, блгв. Кн.
Из млада явился еси, богомудре княже Гаврииле, / Божественный сосуд, избран Богови, / благочестием воспитан, веру непорочну соблюд / и многи святыя церкви устроив, / изгнание претерпел еси от своих, / якоже и целомудрии прародители твои от брата убиение. / С нимиже предстоя Святей Троице, / молися Державе Российстей сохраненной быти / и всем нам спастися.

Величание. Всеволоду, в св. Крещении Гавриилу, Псковскому, блгв. Кн.
(на обрет. мощей блгв. кн. Всеволода (Гавриила)): Ублажаем тя, / благоверный княже Гаврииле, / и чтим обретение честных мощей твоих, / и ныне молиши за нас / Христа, Бога нашего.

Тропарь. Вячеславу Чешскому, блгв. Кн.
Днесь Ангели с человеки радуются вкупе общим веселием. / Небо и земля светло ликуют в память ти, святе. / И мы, грешнии, прилежно ти вопием: / помолись к Владыце о нас, избавити ны от напасти, видимых и невидимых враг, / чтущих пресветлую ти память.

Тропарь. Георгию (Юрию) Всеволодовичу Владимирскому, блгв. вел. Кн.
На высоте великаго княжения седя, / явился еси, благочестием и верою сияя отечеству своему, яко солнце; / по Свя¬тей Троице ревностию разжегся / и за веру крепко пострадав, кровь твою пролиял еси. / Тем и отсеченная твоя за Христа глава свидетельствует яве о тебе, / прилепшая по смерти к телеси твоему, / с нею же и до днесь нетленны пребывают мощи твоя, / от нихже источаеши исцеления душам и телесем нашим. / Но яко дерзновение имея ко Христу, страстотерпче Георгие, / непрестанно моли державу твою и сродник твоих / безвредну сохранити молитвами твоими.

Тропарь. Глебу, во св. крещении Давиду, блгв. Кн.
Мученик Твой, Господи, / спасшеся веры ради, / княже Глебе, / труждающимся быстрый помощник / и ненадежным надежа. / Ты бо болезни врачуеши притекающим к тебе с верою. / Темже и мы верою молимся / от бед избави нас, / чтущим любовию память твою.

Тропарь. Глебу Владимирскому, блгв. кн.
Днесь светло красуется славнейший град Владимир, / имея в себе пребогатое сокровище — / чудоточащия честныя мощи благовернаго князя Глеба, / имиже украшаяся и хваляся, / вселенную всю созывает к веселию / и велегласно вопиет: / о Владыко Христе, / даровавый таковую благодать угоднику Твоему, / его молитвами помилуй нас.

Тропарь. Даниилу Московскому, блгв. кн.
Явился еси стране нашей яко звезда пресветлая, / благоверный княже Данииле, / лучами света твоего озаряя град твой и обитель твою, / людем православным поборник еси, / пленным свободитель и нищим защититель, / моли Христа Бога / державе Российстей даровати мир / и спасти души наша.

Тропарь. Димитрию Угличскому и Московскому, блгв. Царевичу.
Царскую диадиму обагрил еси кровию твоею, / богомудре мучениче, / за скиптр крест в руки приим, / явился еси победоносец, / в жертву непорочну Владыце принесл еси себе, / яко бо агнец незлоблив от раба заколен еси, / и ныне радуяся предстоиши Святей Троице. / Молися о державе сродников твоих богоугодней быти / и сыновом Российским спастися.

Тропарь. Димитрию Донскому, блгв. вел. Кн.
Велика обрете в бедах тя поборника земля Русская, / языки побеждающа. / Якоже на Доне Мамаеву низложил еси гордыню, / на подвиг сей прияв благословение преподобнаго Сергия, / тако, княже Димитрие, / Христу Богу молися / даровати нам велию милость.

Тропарь. Довмонту во св. Крещении Тимофею, Псковскому, блгв. Кн.
Иже отчее нечестие возненавидев, / преблаженне княже Довмонте, / и нощи страстныя избег, еже к идолом тщание, / прииде мыслию к Солнцу славы — Христу, / озарився благодатию Божественнаго Крещения, / и ныне во свете Пресвятыя Троицы предстоя, / моли Христа Бога сохранити и спасти православныя люди / и град твой от безбожных агарян, / и латин нашествия, и междоусобныя брани/и спастися душам нашим.

Тропарь. Игорю Черниговскому и Киевскому, блгв. вел. Кн.
Наста днесь всечестная память страстотерпца благовернаго князя Игоря, / созывающая люди в пречестный храм Спасов, / идеже радостно сошедшася благочестивых множество / молитвенно празднуют святую память твою, и с верою взывают ти: / молися, святе, / Стране Российстей, граду Чернигову и всем православным Христианом / в мире и благоденствии спастися.

Величание. Игорю Черниговскому и Киевскому, блгв. вел. Кн.
Величаем тя, / страстотерпче святый княже Игоре, / и чтем святую память твою, / ты бо молиши о нас / Христа Бога нашего.

Тропарь. Иоанну Угличскому, в иночестве Игнатию, Вологодскому, блгв. Кн.
В житий своем многи скорби претерпел еси, блаженне, / и терпения ради венец от Бога приял еси, / и по смерти своей чудотворец показался еси, / того ради память твою песньми почитаем, / преподобне отче наш Игнатие, / молися, предстоя Святей Троице, / державе сродник твоих Богоугодней быти / и сыновом Российским спастися.

Тропарь. Константину (Ярославу) и чадом его Михаилу и Феодору, Муромским чдтв.
Константин днесь весело ликовствует, / предстоя Престолу Пресвятыя Троицы, / видя отечествие свое, мастию духовною сияющее: / емуже последоваша Михаил и Феодор, сынове его, / и молятся вси трие вкупе о душах наших.

Тропарь. Лазарю, блгв. кн. Сербскому.
Красоту возжелев славы Божия, / в земней Тому благоугодил еси / и, порученный ти талант добре возделав, усугубил еси, / о немже и подвизався до крове. / Отонудуже и мзду болезней твоих, / яко мученик, приял еси от Христа Бога: / Егоже моли спастися / поющим тя, Лазаре.

Тропарь. Михаилу Тверскому, блгв. кн.
Возвысив ум твой к Богу, / и жития со Ангелы возжелел еси, / тленную славу земную оставил еси, блаженне, / и поло¬жил еси душу твою за люди твоя, / восприял еси венец противу трудов твоих, Богомудре Михаиле, / моли Христа Бога о чтущих любовию святую память твою.

Величание. Михаилу Тверскому, блгв. кн.
Величаем тя, / благоверный княже Михаиле, / и чтим святую память твою, / иже за Христа кровь свою излиял еси, / и ныне молиши за нас / Христа, Бога нашего.

Тропарь. Мстиславу, во св. Крещении Георгию, Храброму, Новгородскому, блгв. Кн.
Измлада явился еси, Богомудре княже Мстиславе, / Божественный сосуд, избран Богови, / благочестием воспитан, / веру непорочну соблюл еси. / Темже предсдтоя Святей Троице, / молися стране Российстей сохраненной быти / и всем нам спастися.

Тропарь. Олегу Брянскому, блгв. кн., прп.
От юности возлюбив Христа всем сердцем, преподобне, / славу земную, яко преходящу, оставил еси / и царство земное в ничтоже вменивше, / лику инок радостно причелся еси / и труды многими град Брянск, аки солнце пресветло, озарил еси: / тем, быв Троицы украшение, / моли, княже Олеже, Христа Бога, спастися душам нашим.

Тропарь. Роману Угличскому, блгв. кн., глас 4:
От младенства явился еси, право¬верный княже Романе, / избран от Бога / благочестия столп необорим, / веру непорочну соблюл еси, / молитвами и милостынею и постом Богу угодил еси; / темже и по смерти явися светлость жития твоего, / исцеляеши бо недуги немощствующих, / верою притекающих ко святому твоему гробу. / Сего ради вопием ти: / радуйся, угодниче Божий Романе, / града Углича похвало и утверждение.

Тропарь. Роману (Олеговичу) Рязанскому, блгв. Кн.
Мученьми странноужасными / и доблестию терпения / всех преудивил еси, княже Романе: / честных бо членов твоих по составом резание / и всего телесе твоего раздробление / претерпел еси за веру Христову. / Темже и возшел еси к Престолу Царя Христа Бога / и явился еси новый предстатель Церкве Рязанския. / Молися убо ко Господу, / да мир и благоденствие дарует граду нашему, / и испроси у Него милость и спасение / чтущим священную память твою, многострадальне.

Тропарь. Ростиславу-Михаилу, блгв. вел. кн.
Обрете тя строителя градов и церквей / земля Киевская, / великий княже Ростиславе, / смуты устранял еси, единство храня, / темже Господь тебе мудрость низпосла, / сего ради Христу Богу молися / спастися душам нашим.

Тропарь. Тамаре, царице Грузинской, блгв.
Во святых дивная, / Иверии светило, / благоверная царице Тамаро, / на горах высоких храмы воздвигшая, / да в них моления возсылают ко Господу, / мольбами твоими крепость даровавшая воем христолюбивых людей страны Иверския, / десницею же своею полчища агарянская ниспровергшая, / моли Христа Бога / спастися душам нашим.

Тропарь. Петру, в иночестве Давиду, и Февронии, в иночестве Евфросинии, Муромским чдтвв., блгвв. кнн., глас 8:
Яко благочестиваго корене пречестная отрасль был еси, / добре во благочестии пожив, блаженне Петре, / тако и с супружницею твоею, премудрою Феврониею, / в мире Богу угодивше / и преподобных житию сподобистеся. / С нимиже молитеся Господеви / сохранити без вреда отечество ваше, / да вас непрестанно почитаем.

Величание. Петру, в иночестве Давиду, и Февронии, в иночестве Евфросинии, Муромским чдтвв., блгвв. кнн.
Ублажаем вас, / святии чудотворцы Петре и Февроние, / и чтим святую память вашу, / вы бо молите за ны / Христа, Бога нашего.

Тропарь. Феодору Ярославичу, Новгородскому, блгв. Кн.
От благочестиваго корене отрасль благочестивая прозябл еси / и, скончався в юности, лета долга твоими добродетельми исполнил еси, / благоверный княже Феодоре, / сего ради Владеющему временами молимся, / да молитвами твоими подаст нам долготу лет / и низпослет стране нашей велию и богатую милость.

Тропарь. Ярополку, во св. крещ. Петру, кн. Владимиро-Волынскому, блгв.
Яко благоверен и праведен, / за любовь Христа Бога от своих смерть приял еси, Ярополче, / страстотерпче святый, благоверный княже Волынский, / и пролиял еси кровь твою, / якоже прежде сродницы твои и страстотерпцы, Богоблаженнии Борис и Глеб, / ихже подвигом ревнуя благочестно, / Господеви взывал еси усердно: / даруй ми кончину, якоже братиям моим, / да и аз омыю грехи моя кровию моею / и избавлюся мира сего тщетнаго и мятежнаго. / Темже, днесь сошедшеся в память твою, / верою и любовию славим Господа, / укрепившаго Тебе в подвизе напрасныя смерти, / яко же бо агнец незлобивый, / от раба заколен еси, / и себе самаго жертву непорочну Господеви принесл еси, / Егоже моли, присноблаженне, / спасти Отечество твое / и сыновом Российским спастися.

Тропарь. Василию и Константину Ярославским, блгвв. кнн.
Ваше отечество хвалится обагрением кровей ваших, / Церковь же Божия радуется, / приемши телеса ваша, / людие, песненный лик составльше, / духовною цевницею вопиют: / ликуй, Василие, радуйся, Константине, / Ярославлю славо и всей России радосте.

Тропарь. Владимиру и Агриппине Ржевским, блгвв. кнн.
Яко благочестиваго корене пречестная отрасль был еси, / добре во благочестии пожив, блаженне Владимире, / тако и с супружницею твоею, прехвальною Агриппиною, / в мире Богу угодивше, и преподобных житию сподобистеся. / С нимиже молитеся Господеви / сохранити без вреда отечество ваше, / да вас непрестанно почитаем.

Тропарь. Глебу Всеволодовичу Городенскому (иже в Киеве), блгв. кн.
В постничестве от юности добре подвизався, Богомудре, / ум на враги мужески вооружив, / оружием крестным сих победил еси, / твердомудростная повлача, в душу вложи свою. / Темже похваляем тя, княже наш Глебе, / яко постником ты еси удобрение, / Киеву — слава / и всей Русстей земли — утверждение.

Тропарь. Перенесение мощей.
Яко звезды многосветлыя от юности возсиявше, / осветили есте сердца верных пренесением честных мощей ваших, / во плоти, яко Ангелы на земли показастеся, / пощением насаждени бысте яко древа, при водах воздержания, / напоени струями слез ваших, и скверну омысте. / Сего ради явистеся приятелища Божия Духа, / Феодоре, и Давиде, и Константине, / молите Христа Бога, спастися душам нашим.

Тропарь. Феодору Смоленскому и чадам его Давиду и Константину, блгв. кнн.
От юности вашея Христове любви прилепившеся, святии, / усердно закон и оправдания Того сохранисте, / отонудуже и чудесными дарованьми обогатившеся, / исцеления источаете, Феодоре, Давиде и Константине, / с верою вас почитающих, / молите Христа Бога, / спастися душам нашим.

Тропарь. Феодору Смоленскому, блгв. кн.
Яко целитель преизряден и казатель благоприятен / мирский мятеж оставил еси / и крест свой на рамо взем / и божественным житием пожил еси и воздержанием плоти украсился еси / к тебе притекающим сосуд избранный показа тя, всеблаженне Феодоре, / воспевающих твою память в псалмех и песнех, преподобне, / молися о душах наших.

Тропарь. Феодору Стародубскому, блгв. Кн.
Божественным желанием от юнаго возраста весь сам себе Господеви возложив, / в молитвах и постех образ был добродетели, / богатство же, и славу, и доброродство телесное яко не сущее презрев, / Христа единаго от души возлюбил еси, / и Того Истиннаго Бога пред нечестивым царем исповедал еси, / и доблестию терпения своего сего ужасил / и всех преудивил еси. / Телом бо, яко розга, обрезаемь, / на кийждо состав, удеси резания / благодарны молитвы изрек еси Господеви. / Тем во страдании своем венец прием, / к Престолу возшел еси славы / и со Ангелы предстоиши, всехвальне Феодоре, / моли Христа Бога спастися душам нашим.

Тропарь. Феодору Ярославичу, Владимирскому, блгв. Кн.
В жизни сей утвердися верою, / в заповедех Господних пребываше непреклонен, / благоугодих Тому, яко благочестив самодержец / Емуже подобяся о врученных ти христоименитых людех, / душу свою положити потщався, / в землю идяше всезлую и безбожную / и тамо, пред нечестивым мучителем Христа дерзновенно исповедав, / мученический венец прият, / темже, премудре Феодоре Ярославиче, / Избавителя моли избавити от бед отечество твое и люди, / да тя вси непрестанно почитаем.