Никольско-Иорданская Церковь

 

 

Главная
История храма
Житие св. Николая
Чудеса св. Николая
Обзор икон св. Николая
Православный календарь
О Постах
Молитвы
Десять заповедей
Домашний иконостас
Расписание служб
Гостевая книга
Ваша помощь

 

Сервер 'Россия Православная'

 

  Молитвы /

ТРОПАРИ ПРАВЕДНЫМ И БЛАЖЕННЫМ


Тропарь. Андрею, Христа ради юродивому, блж.
Глас апостола Твоего Павла услышав, глаголющ: / мы юроди Христа ради, / раб Твой, Андрей, юрод бысть на земли / Тебе ради, Христе Боже. / Темже ныне память его почитающе, / Тебе молимся, Господи, спаси души наша.


Тропарь. Андрею Тотемскому, Христа ради юродивому, блж.
Терпением и мужеством Христа ради юродство восприял еси, блаженне Андрее, / в посте и бдении пребывая, / тягость зноя летняго понесл еси, / и мразы зимния терпя, / темже и ныне приходящим с верою к тебе, / исцеление неоскудно подаеши, / моли Христа Бога спастися душам нашим.


Тропарь. Анне, прав.
Жизнь рождшую во чреве носила еси, / Чистую Богоматерь, богомудрая Анно: / темже к приятию небесному, идеже веселящихся жилище, / в славе радующися, ныне преставилася еси, / чтущим тя любовию / прегрешений просящи очищение, / присноблаженная.


Тропарь. Иоакиму и Анне, Богоотцам, правв.
Иже в законней благодати праведни бывше, / Младенца богоданнаго породиша нам, Иоаким и Анна. / Темже днесь светло торжествует, / весело празднующи божественная Церковь, / честную вашу память, / славящи Бога, воздвигшаго рог спасения нам в дому Давидове.


Величание. Иоакиму и Анне, Богоотцам, правв.
(на успение прав. Анны): Величаем тя, / святая праведная Анно / прамати Христа Бога нашего, / и всечестное славим / успение твое.


Тропарь. Артемию Веркольскому, отроку.
Вышняго повелением / тученосным облаком небо помрачившим, / и молниям блистающим, / грому же возшумевшу с прещением, / испустил еси душу твою в руце Господеви, / премудре Артемие, / и ныне предстоиши Престолу Владыки всех, / о иже верою и любовию приходящим к тебе, / подая исцеление всем неотложно, / и моляся Христу Богу, / спастися душам нашим.


Величание. Артемию Веркольскому, отроку.
Величаем тя, / страстотерпче Христов, Артемие, / и чтим святую память твою, / ты бо молиши за нас / Христа Бога нашего.
Тропарь. Афанасию Наволоцкому, прав.
Божественною благодатию просветився, / и по смерти даруеши исцеления притекающим к тебе, / премудре Афанасие, / темже и мы ныне чтим честных мощей твоих явление, / веселящее вкупе души и телеса. / Тем вси вопием: / слава Давшему ти крепость, / слава Венчавшему тя, / слава Действующему тобою всем исцеления.


Тропарь. Василию Мангазейскому, мч., прав.
Богатство видев чистыя души твоея, Василие, / украсти тщашеся праведных враг, / подусти господина твоего, / иже покраденнаго ради богатства своего предав тя судии, / и от того неповинне многия претерпел еси муки, / непобедим пребыв до смерти. / Тем, яко приемый венец страдания от всех Владыки, / моли всем от напастей свободным быти, / чтущим любовию святую память твою.


Тропарь. Василию, Христа ради юродивому, Московскому чдтв., блж.
Якоже бо солнце и луна наготою своею не срамляются, / тако и ты, угодниче Христов Василие наг сый, не срамляшеся, / восприят бо ризу Адама первозданнаго, / юже он ношаше прежде в раи, / ты же сию на земли поносил еси; / и был еси добрый купец: / елико имеяше, вся остави / и купи мздою терпения своего село, / на немже сокровен безценный Бисер, Христос. / Сего ради явися всем грешным образ покаяния / и вселися в райскую широту, / и, предстоя Христови, / не забуди град, в немже обита, и люди, преблаженне, / и моли спасти души наша.


Тропарь. Гликерии деве, Новгородской, прав.
Вышния красоты желающи, / нижния сласти телесныя далече от себе отринула еси / и, нестяжание паче суетнаго мира возлюбивши, / ангельское житие провождала еси, Гликерие, дево блаженная, / моли Христа Бога спастися душам нашим.


Тропарь. Еввуле, прав.
Всерадостное дарование от Бога / святым женам — святыя дети; / всерадостное даяние и тебе, святая Еввуло, — / святый великомученик Пантелеимон, / милости тезоименитый, / недугующих целитель и наш заступник. / Слава убо о вас Всемилостивому Владыце, / слава Подающему вами цельбы, / слава предстатели наши вас Показавшему.


Тропарь. Евдокиму Каппадокиянину, прав.
От земли воззвавый тя к Небесным селением / соблюдает и по смерти невредимо тело твое, святе Евдокиме: / ты бо в целомудрии и чистом жительстве, блаженне, / жительствовал еси, не осквернив плоти. / Темже со дерзновением моли Христа Бога спастися нам.


Тропарь. Елезвою, царю Ефиопскому, блж.
Иже Божественным рачением подвигся / на отмщение пролитыя крови праведных, / яко Давид от Самуила, / ты же от Зинона предивнаго, / пророчески яже сбытися тебе предрекша, / еже обещанием к нему, / и того благословением победы на враги и одоления показавшу, / отнюду же со отложением царства / постных селений горы жизнь соверши, Елезвое царю, / моли Небеснаго Царя Христа / спасти души наша.


Тропарь. Иакову Боровичскому, Новгородскому, прав.
Божественною благодатию просветився, / и по смерти даруеши исцеление / притекающим к тебе, премудре Иакове: / темже и мы ныне чтим честных мощей пренесение, / веселяще вкупе души и телеса. / Тем вси вопием: / слава Давшему ти крепость! / Слава Венчавшему тя! / Слава Действующему тобою всем исцеления!


Тропарь. Иакову и Иоанну Менюжским, отрокам, правв.
Болезньми святых праведных отроков / Иакова и Иоанна, / имиже о Тебе пострадаша, / умолен буди, Господи, / и вся наша болезни исцели, / Человеколюбче, молимся.


Тропарь. Иерониму Стридонскому, блж.
Велика имеет тя предстателя, Богомудре, / православных собрание, / якоже убо преподобных еси собеседник / и Божественныя премудрости сопричастник, / тако, пречудне Иерониме, / Христу Богу молися / даровати нам велию милость.


Тропарь. Иоанну, деспоту Сербскому, блж.
Дивен, творяй преславная чудеса / и прославляяй по кончине славящия Тя, / нетленная телеса их являя / и чудодействии люди обогащая / во славу святаго Имене Своего, / даровавый нам тело угодника Своего Иоанна, / молящагося о душах наших.


Тропарь. Иоанну, Христа ради юродивому, Устюжскому, блж.
Наготою телесною и терпением / обнажил еси вражия коварствия, / обличая неподобное его деяние, / зельне стражда солнечный вар / и нуждныя великия студени мраза, / и огня не чул еси, / Божиею помощию покрываемь, / Иоанне премудре, / моли о верою творящих память твою честно / и усердно притекающих к раце мощей твоих, / избавитися от бед и падения избежати.


Тропарь. Иоанну, Христа ради юродивому, Московскому, блж.
Иже Христа ради волею оставив твое отечество, град Вологду, / и вся красная мира сего возненавидев, / желанием духовным вселился еси во град Ростов, / яко в пустыни скитаяся в нем, / гладом и жаждею и безмерною тяготою плоть твою изнуряя / и работая Господеви день и нощь, / в посте и молитве пребывая в притворе церковнем, / власы же главы твоея пеплом и смолою удручая, / и, ревнуя Василию блаженному, / пришел еси в царствующий град Москву / и, в целомудрии и терпении течение добре скончав, / преселился еси к вечным обителем, / чудес лучи испущая, / преблаженне Иоанне, отче наш, / моли Христа Бога спастися душам нашим.


Тропарь. Иоанну Кронштадтскому, прав.
Православныя веры поборниче. / Земли Российския печальниче, / пастырем правило и образе верным, / покаяния и жизни во Христе проповедниче. / Божественных таин благоговейный служителю / и дерзновенный о людех молитвенниче, / отче праведный Иоанне, /целителю и предивный чудотворче, / граду Кронштадту похвало / и церкви нашея украшение, / моли всеблагаго Бога / умирити мир и спасти души наша.


Тропарь. Иоанну Власатому, Ростовскому чдтв., блж.
Явился еси во граде яко в пустыни, / в смиренномудрии, чистоте и в трудех, и подвизех, и в терпении мнозе, преблаженне отче Иоанне. / Взем бо Крест Христов последова Ему / и бе в молитвах и псалмопении день и нощь, / иноязычнаго речения о спасении всего мира христианскаго рода / и преселился еси к Невечернему Свету. / Ныне же ко гробу Твоему вернии приходящии, / моляся Господеви, Богородице и Предтечи, приемлют исцеления молитвами твоими. / Но присно за ны молися, блаженне отче Иоанне, спастися душам нашим.


Тропарь. Иоанну Русскому, исп., прав.
От земли пленения твоего / воззвавый тя к Небесным селением, / Господь соблюдает невредимо и цельбоносно тело твое, / праведне Иоанне, / ты бо, в России ятый и во Асию проданный, / посреде, агарянскаго злочестия благочестно пожил еси во мнозе терпении / и, сеяв зде слезами, / жнеши тамо неизглаголанною радостию. / Темже моли Христа Бога спастися душам нашим.


Тропарь. Иову Многострадальному, прав.
Богатство видев добродетелей Иовлих, / украсти кознствовавше праведных враг, / и, растерзав столп телесе, / сокровище не украде духа, / обрете бо вооружену непорочнаго душу, / мене же и, обнажив, плени, / предварив убо мя прежде конца, / избави мя, льстиваго, Спасе, и спаси мя.


Тропарь. Иосифу Аримафейскому, прав.
Благообразный Иосиф с древа снем пречистое Твое тело, / плащаницею чистою обвив, / и благоуханьми во гробе нове закрыв положи / но тридневен воскресл еси Господи, / подаяй мирови велию милость.


Тропарь. Иосифу Обручнику, прав.
Благовествуй, Иосифе, Давиду чудеса Богоотцу, / Деву видел еси рождшую, / с пастырьми славословил еси, / с волсви поклонился еси, / ангелом весть прием: / моли Христа Бога / спасти души наша.


Тропарь. Исидору, Христа ради юродивому, Ростовскому чдтв., блж.
Просветився Божественною благодатию, Богомудре, / целомудрием многим и терпением / во временней жизни течение добре скончал еси. / Тем и по смерти яви тя светлость жития твоего: / источаеши бо исцелений благодать / иже с верою притекающим ко святому твоему гробу, / Исидоре блаженне, / моли Христа Бога, / да спасет души наша.


Тропарь. Иулиании, кн. Вяземской, Новоторжской, прав.
Благочестно в законе поживши / и благими делы украсившися, / яко крепкий адамант, явися, / целомудренная святая благоверная княгине Иулиание, / тленную славу и добротство телесное презревши, / злокозненнаго врага победила еси, / целомудрия ради мученическую смерть прияла еси. / Сего ради от Христа Бога нетленным и вечным венцем венчавшися, / ныне с лики мученик ликуеши / и нам велия чудеса, приходящим ко гробу твоему, обильно источаеши. / Темже ти вопием: / молися Христу Богу о всех нас, / верою и любовию страдания твоя почитающих.


Тропарь. Иулиании Лазаревской, Муромской, прав.
Просветившися Божественною благодатию, / и по смерти светлость жития твоего явила еси: / источаеши бо миро благовонное всем болящим на исцеление, / с верою приходящим к мощем твоим, / праведная мати Иулиание, / Христа Бога моли / спастися душам нашим.


Тропарь. Иулиании деве, кн. Ольшанской, прав.
Девства добротами преочищена / и целомудрия цветы венчавшися, / Богоблаженная дево Иулиание, / явилася еси миру в нетленнем телеси твоем, / источник исцелений и даров духовных подающи всем к тебе притекающим, / и ныне, яко свеща теплая, благодати елеем возжженная, / предстоящи Престолу Господа и Жениха твоего Небеснаго, / Того моли, дево чистая, / избавити нас от всякаго зла, / чтущих память твою верою и любовию.


Тропарь. Ксении Петербургской, блж.
Нищету Христову возлюбивши, / безсмертныя трапезы ныне наслаждаешися, / безумием мнимым безумие мира обличивши, / смирением крестным силу Божию восприяла еси. / Сего ради дар чудодейственныя помощи стяжавшая, Ксение блаженная, / моли Христа Бога / избавитися нам от всякаго зла покаянием.


Тропарь. Лаврентию, Христа ради юродивому, Калужскому, блж.
Просветився божественною благодатию, Богомудре, / и весь разум и сердце от суетнаго мира сего / к Зиждителю неуклонно возложив, / целомудрием и многим терпением во временней жизни течение добре скончал еси / и веру соблюл еси непорочну. / Темже и по смерти явися светлость жития твоего, / источаеши бо чудесем источник неисчерпаемый / верою притекающим ко святому твоему гробу, Лаврентие всеблаженне, / моли Христа Бога, да спасет души наша.


Тропарь. Лазарю Четверодневному, еп. Китийскому, прав.
Яко велико сокровище и богатство некрадомо / к нам прииде из Кипра, Лазаре, / Промыслом всех Бога, повелением царя благочестива, / подая чтущим тя исцеления даром, / избавляя от бед и от всякаго вреда, / верою взывающих ти: / спаси всех молитвами своими, Лазаре отче наш.


Тропарь. Максиму, Христа ради юродивому, Московскому чдтв., блж.
Наготою телесною и терпением / обнажил еси вражия коварствия, / обличая неподобное его деяние, / зельне стражда солнечный вар / и нуждныя великия студени, / мраза и огня не чул еси, / Божиею помощию покрываемь / Максиме премудре, / о верою творящих память твою честно / и усердно притекающих к мощем твоим / моли избавитися от бед / и падения избежати.


Тропарь. Максиму, иерею Тотемскому.
Непорочным священством Богови послужив, / посреде мирскаго мятежа юродство избрал еси, / взем бо крест, последовал еси Христу невозвратным помыслом / и, с любовию к Нему добродетельми приближаяся, / земная оставив, Небесная восприял еси, / блаженне Максиме, отче наш, / моли Христа Бога / сохранитися граду Тотьме невредиму / и спастися душам нашим.


Тропарь. Марфе и Марии, сестрам Лазаря Четверодневного.
Праведнаго Лазаря боголюбивыя сестры, / Марфо и Марие преславныя, / чистым сердцем Христа в житии вашем возлюбили есте, / мироносиц вземша чин, / и Его, яко Сына Божия, безбоязненно исповедали есте: / сего ради ныне во обителех Отца Небеснаго / со ангелы и всеми святыми славно царствуете. / Умолите, Егоже возлюбили есте, / и нам грешным в вере и любви Христове утвердитися / и Царствия Небеснаго сподобитися.


Тропарь. Матроне, блж.
Земли Тульския прозябение, / града Москвы ангелоподобная воительнице / блаженная старице Матроно. / От рождения в слепоте телесней до конца своих дней пребывшая. / Но от Бога щедро духовное зрение приявшая, / прозорливице и молитвеннице. / Наипаче дар исцеления болезней стяжавшая. / Помогай всем с верою к тебе притекающим и просящим в болезнех душевных и телесных, / радосте наша.


Тропарь. Николаю Кочанову, Христа ради юродивому, Новгородскому, блж.
Терпением своим и мужеством / Христа ради во юродство претворився, блаженне Николае, / худость ризную имея, / тягость вара дневнаго понесл еси / и мразы зимныя терпел еси. / И ныне, в Вышних Троице предстоя, / нам, приходящим с верою к раце мощей твоих, / исцеление подаеши, твое успение честно славящим, / и молиши Христа Бога спастися душам нашим.


Тропарь. Николаю, Христа ради юродивому, Псковскому.
Словенска языка, Псковския земли / плотски в юродстве быв, / юродства притворением Горняго Иерусалима гражданин явися, / Ангелом, славне, свеселишися, / мироточиваго святителя Николая звание восприим, / с нимже всегда Христа Бога моли / даровати нам велию милость.


Тропарь. Прокопию, Христа ради юродивому, Вятскому, блж.
Иже на земли Христа ради волею в буйство преложися, / и мира сего красоты отнюд возненавиде, / и плотская играния увядив постом и жаждою / и на земли леганием, / от зимы студению и мразом, / и от зноя солнечнаго и дождя / и прочия тяготы никогда же уклонися под кров, / и на теле своем не имея одеяния, / Божиею помощию покрываема / и душу очистил еси добродетельми своими, / яко злато в горниле, / Прокопие премудре, / с верою творящим память твою честно / и усердно притекающим к мощем твоим, / прославляюще твое святое успение, / Христу Богу молися, благоюроде, / да избавит ны Господь от варварскаго нашествия и междоусобныя брани / и мир мирови дарует / и душам нашим велию милость.


Тропарь. Прокопию Устьянскому, прав.
Божественною благодатию просветився, / и по смерти даруеши исцеления / притекающим к тебе, премудре Прокопие, / темже и мы ныне чтим честных мощей твоих явление, / веселящее вкупе души и телеса. / Тем вси вопием: / слава Давшему ти крепость, / слава Венчавшему тя, / слава Действующему тобою всем исцеления.


Тропарь. Прокопию, Христа ради юродивому, Устюжскому чдтв., блж.
В терпении твоем от Бога мзду дарований пророчества / приял еси, блаженне, / молитвами, бдением и пощением / тело свое изнурив, / душу же возвысив на Небесная, / Царя всех Христа Бога славы зрети сподобися / и неувядаемым венцем увязеся. / Емуже с лики святых предстоя, / за люди своя моление предлагая, / тепле пролия слез источник, / избавил еси град Великий Устюг и люди своя / от труса страшнаго, и огня, и напрасныя смерти. / Темже и мы, к честней раце твоей припадающе, вопием ти: / о Прокопие чудоносне, / ходатай нам буди ко Господу / во дни нашедших печалей, рабом твоим, / и молися, да спасет души наша.


Тропарь. Симеону Богоприимцу, прав.
Симеон старец днесь веселится, / восприят на руку свою Младенца Превечнаго Бога, / от уз плоти разрешитися прося / и вопия: / видеста очи мои спасение Твое мирови.


Тропарь. Симеону Верхотурскому, прав.
Мирскаго мятежа бегая, / все желание обратил еси к Богу, / да в видения восход обрящеши Горе, / отнюдуже не уклонився в лукавствия сердца, / но очистив душу и тело, / приял еси благодать точити цельбы верным и неверным, / притекающим к тебе, праведный Симеоне. / Темже, по данному ти дару, / испроси у Христа Бога исцеление нам, / болящим душевными страстьми, / и моли спасти души наша.


Тропарь. Симону, Христа ради юродивому, Юрьевецкому чдтв., блж.
Яко воистинну гласа апостольскаго / послушатель был еси, блаженне Симоне, / Христа бо ради изволив имети буйство, / в немже соблюл еси твоя к Богу добродетели, посреде молв некрадомы, / терпением убо пачеестественным Христу подражав, / посрамил еси льстиваго всю гордыню, / тем и в лютых ранах, / якоже древний Лазарь, в недра Авраамля преселился еси, / идеже и ныне утешаяся, посещай град твой, / почитающий любовию святую память твою.


Тропарь. Софии, кн. Слуцкой, прав.
Блаженная мати Софие, / нетлением мощей и чудес сиянием почти тя Бог; / поминающе твое праведное житие, / тя молим испросити / телесем нашим здравие и душам спасение.


Тропарь. Стефану Щиляновичу, Сербскому, кн., прав.
На земли премудрости славу стяжал еси, / богатство Господеви своему вручил еси, / и Той тя с Небесными водворяет, / тело твое на земли, святе, сохрани невредимо, / ты бо в целомудрии и чистоте / житие праведно пожил еси, / тем с дерзновением моли спастися нам.


Тропарь. Стефану Урошу V, королю Сербскому.

Юношески процвел еси / во отечествии твоем, добротою украшен, / и неправедную и безвременную смерть подъял еси, / Уроше всечестне; / царскаго корене плод сладок, / аще и не во время созрев, / в Господню житницу вселился еси / и жалость велию сродству твоему оставил еси. / Молися о нас, творящих святую память твою.


Тропарь. Стефану Милютину, королю Сербскому, прав.
Ты на земли вседушно Христа возлюбив / и Того заповеди соблюдая, / яко река, благоутробием иссохших нищетою богатно напоил еси / и люди своя снабдел еси, / и рака мощей твоих благоухания цельбы всем подает, / сего ради, святе, молим тя, / испроси душам нашим велию милость.


Тропарь. Тавифе, прав.
Днесь вера Христова утверждается камнем веры, / и ликовствует в веселии Иоппия, / псаломски славословят Жизнодавца Сына Божия вернии, / видяще совершаемо велие чудо: / первоверховный апостол глаголет, / и умершая востает от гроба, / юже Низложитель смерти дарует Церкви, / да украшаются во образ ея добродетельми люди. / Приидите убо, христиане, / принесем ко святей моления наша: / блаженная Тавифо и милосердная, / вознеси наша воздыхания Пресвятей Троице / и молися со дерзновением, / да сынове Света Превечнаго будем, / да сподобимся Божия милости, / да пребываем в любви Божественней, / и да царствует мир во вселенней.


Тропарь. Феодору, Христа ради юродивому, Новгородскому, блж.
Иже на земли Христа ради волею в буйство преложився, / мира сего красоты отнюд возненавидел еси / и, плотская играния увядив постом и жаждею и на земли леганием, / от зноя же и студени, от дождя и снега / и от прочия воздушныя тягости никогдаже уклонился еси, / душу же очистил еси добродетельми, яко злато в горниле, / отче преблаженне Феодоре, / и ныне на Небесех предстоиши Престолу Пресвятыя Троицы, / но яко имея дерзновение многое, / моли Христа Бога спастися душам нашим.


Тропарь. Филарету Милостивому, прав.
Аврааму в вере подражая, / Иову же в терпении последуя, / отче Филарете, / благая земли разделял еси неимущим / и лишение сих терпел еси мужественне. / Сего ради светлым тя венцем увенча Подвигоположник, Христос Бог наш, / Егоже моли спастися душам нашим.


Тропарь. Аарону, первосвященнику.
Стеблю Левиина корене, / приимый чин древняго Мафусаила, / он бо отча ради к Богу вознесения, / ты же братня ради с Богом беседования, / первосвященный во Израили молебниче о всех, / умоли Бога купно с братом своим боговидцем, / да избавимся от всякия скорби.


Тропарь. Алексию Елнатскому, Христа ради юродивому, блж.
Христа ради юродство приял еси / и мученическаго венца сподобился еси, / и дар пророчества от Бога стяжал еси, / за негоже и заключение претерпел еси, / святый блаженный Алексие, / моли милостивого Бога / грехов оставление нам даровати.


Тропарь. Ионе, Одесскому чдтв., прав.
Православия ревнителю, / раскола и ереси искоренителю, / Одесский целебниче и к Богу теплый молитвенниче, / житием и чудесы твоими уподобился еси Кронштадтскому чудотворцу, / Ионо праведный, моли Христа Бога спастися душам нашим.


Тропарь. Любови Рязанской, блж.
Любовью наречена была еси во святом крещении. / Любовь Христову познала еси, в житии Богу и человеком любовию послуживши, / дерзновение велие стяжала еси, / тем же к Тебе усердно прибегаем, / из глубины сердец наших взывающи: / молися убо ко Господу, Любовь Блаженная, богомудрая / даровати мирови мир и душам нашим велию милость.


Тропарь. Стефану Высокому, деспоту Сербскому, прав.
С высоты восприяв увещание, / отечеству твоему был еси предстатель и просветитель, / святый праведный деспоте Стефане, / супостаты побеждаяй, и люди своя просвещаяй, / и многая храмы устрояяй, / сего ради чтуще тя, молим: / моли Христа Бога о спасении народа сербскаго.

 

Copyright © Николо-Иорданская Церковь 2007-2008