Никольско-Иорданская Церковь

 

 

Главная
История храма
Житие св. Николая
Чудеса св. Николая
Обзор икон св. Николая
Православный календарь
О Постах
Молитвы
Десять заповедей
Домашний иконостас
Расписание служб
Гостевая книга
Ваша помощь

 

Сервер 'Россия Православная'

 

  Молитвы /

ТРОПАРИ ПРЕПОДОБНОМУЧЕНИКАМ


Тропарь. 26-ти преподобномученикам Зографским.
Тревеличайшия светильники, / всех преподобномученик Богоизбранный полк, / двадесять и шесть Божественныя обители Зографския отец, почтим, / прелесть латинскую обличившия / и насильственно во огни скончавшияся; / Фому пастыреначальника, священнаго Варсонофия, / достославнаго Парфения и прочия, подвизавшияся, / сошедшеся, песньми почтим, / сии бо Троицу Святую / присно о нас умоляют.


Тропарь. Адриану Пошехонскому, Ярославскому.
Христову мученику Адриану тезоименит был еси, преподобне, / многия труды подъял еси в жизни временней, / обитель иноческую созидая в пустыни, / идеже пострадал еси даже до крове от злых разбойник / и мученическую смерть от них приял еси, / Адриане славне, / чудес благодатию обогатився, / предстоиши всех Царю, Христу Богу, / Егоже моли спастися душам нашим.


Тропарь. Евфимию, Игнатию и Акакию Афонским.
Равночислении Троицы Несозданныя суще, / с лики Ангелов и чины мучеников / предстоите вы, радующеся, Престолу Божества, мудрии. / Сего ради причастием сияние отонуду приемлюще, / источник исцелений верным подаете / и Божественное просвещение, / мучениче Христов Евфимие со Игнатием мудрым и с Божественным Акакием, / о нас присно молитеся.


Тропарь. Анастасию, диакону Печерскому, в Ближних пещерах.
Плотское, яко безплотный Ангел, возненавидевши препитание, / духовную во иноческом чину возлюбил еси пищу, / и в нем Боговидцу на Синаи Моисею / добрым жития твоего подвигом уподобляяйся, / многими на горе Божией Печерской возвысился еси добродетельми, / идеже в молении к Вышнему непрестанно пребывал еси, / ныне же со отцы преподобными Печерскими, / аки бисер многоценен, мощми нетленными / в пещере твоими пресветло сияеши, / а душею со Ангелы пред Престолом Божиим, / святый преподобномучениче Анастасие, предстоиши, / о нас всегда моляся ко Господу / спастися душам нашим.


Тропарь. Андрею Критскому.
Постнически предподвизався на горе, / умная врагов ополчения всеоружием Креста погубил еси, всеблаженне. / Паки же ко страдальчеству / мужески облеклся еси, / убив Копронима мечем веры; / и обоих ради венчался еси от Бога, / преподобномучениче Андрее приснопамятне.


Тропарь. Афанасию Брестскому.
Блажен еси, отче наш Афанасие, / яко верно пожил еси, стоя бодренно за святую Православную веру, / со умилением присно поя неседальное Пречистей, / заповедуя никомуже нарушати Православныя веры святыя, / пострадав за свидетельство истины даже до смерти. / Мы же, чтуще святыню твою, / со дерзновением взываем ти: / отче наш, преподобномучениче Афанасие, похвало и украшение наше.


Тропарь. Феодору и Василию Печерским, в Ближних пещерах.
Союзом любве связавшеся, преподобнии, / всяк союз козней вражиих попрасте, / страдание же и смерть неповинне / от сребролюбиваго князя претерпесте добле, / тем молим вас, вкупе поживших / и венцы мучения приемших, / молитеся Господеви о нас, / яко да во мнозей любви, вере и надежди добре поживше, / всегда ублажаем вас, / Феодоре и Василие добропобеднии.


Тропарь. Дометию Персянину.
Постнически преподвизався на горе, / умная врагов ополчения всеоружием Креста погубил еси, всеблаженне. / Паки же ко страдальчеству / мужески облеклся еси, / убив Копронима мечем веры, / и обоих ради венчался еси от Бога, / преподобномучениче Дометие приснопамятне.


Тропарь. Евдокии Илиопольской.
Правостию умною душу твою привязавши в любовь Христову, / тленных и красных и временных забытием претекла еси, / яко Слова ученица, / пощением страсти первее умертвивши, / страдальчески второе врага посрамила еси. / Тем Христос сугубых венцев сподоби тя, / славная Евдокие, преподобная страстотерпице, / моли Христа Бога спастися душам нашим.


Тропарь. Евстратию Печерскому, в Ближних пещерах.
Постником и мучеником явился еси похвала, преподобне Евстратие,/ прежде бо воздержанием плоть умертвив, / последовал еси Христу, нося крест свой. / Последи же и сам на крест вознесен быв / и копием в ребра прободен, / в руце Божии душу предал еси. / Колесницею огненною возносим на Небеса, / сугубо венчался еси от Христа Бога / и Спаса душ наших.


Тропарь. Евфимию Новому, Афонскому, Константино- польскому.
Постнически преподвизався на горе, / умная врагов ополчения всеоружием креста погубил еси, всеблаженне, / паки же ко страдальчеству / мужески облеклся еси, / убив Копронима мечем веры / и обоих ради венчался еси от Бога, / преподобномучениче Евфимие приснопамятне.


Тропарь. Евфросину Синозерскому, Новгородскому.
От юности твоея вперив ум твой к Богу, / блаженне Евфросине, / мира же отвергся, / вселился еси в пустыню непроходимую, / и тамо, от Господа укрепляемь, / в молитвах и пощениих доблественне пожил еси, / и жизнь твою страдальчески / убиением от сынов противления скончал еси, / сего ради со преподобными и мученики венчался еси, / с нимиже и ныне предстоиши Престолу Пресвятыя Троицы. / Сию моли, молим тя, / оставление подати согрешений наших / и даровати нам велию милость.


Тропарь. Елисавете Феодоровне, вел. Кн.
Смирением достоинство княжеское сокрывши, / богомудрая Елисавето, / сугубым служением Марфы и Марии / Христа почтила еси. / Милосердием, терпением и любовию себе предочистивши, / яко жертва праведная Богу принеслася еси. / Мы же, чтуще добродетельное житие и страдания твоя, / яко истинную наставницу усердно просим тя: / святая мученице великая княгине Елисавето, / моли Христа Бога спасти и просветити души наша.


Тропарь. Иосифу, Сергию, Антонию, Варлааму, Иову и Петру Раифским.
Православия неложнии ревнители и зловредных ересей обличители, / пустыни Раифския новомученицы святии, / пред богоборцы Христа исповедали есте. / Пред Престолом Божиим с преподобными отцами ныне предстоя, / молите Христа Бога спастися душам нашим.


Тропарь. Корнилию Псково-Печерскому.
Псково-Печерская обитель, / издревле славная чудесы иконы Богоматерни, / многия иноки Богови воспита, / тамо и преподобный Корнилий / подвигом добрым подвизася, / чудную Богоматерь славя, / иноверныя просвещая, / иноки и многия люди спасая, / обитель же свою дивно украшая и ограждая. / Тамо и мученичества венец / по многих летех пастырства своего доблестне прият. / Темже воспоим, людие, / Христа Бога и Пречистую Его Матерь возблагодарим, / яко дарова нам преподобномученика славна / и молитвенника о душах наших достоблаженна.


Тропарь. Макарию Каневскому, архим. Овручскому, Переяславскому чдтв.
Христу, нас ради с Небес сошедшему, / последовал еси в подвизех твоих, / Макарие, отче наш. / Егоже моли о нас, ублажающих тя, / прощение прегрешений даровати нам, / любовию же и смирением сердца наша озарити / и спасти души наша.


Тропарь. Параскеве Римской.
Тщание имущи сообразно имени твоему, тезоименитая, / равноимянную тебе веру в сожительство избрала еси, / Параскево победоносная / темже изливаеши исцеления и молишися о душах наших.


Тропарь. Стефану Новому.
Постнически предподвизався на горе, / умная врагов ополчения / всеоружием Креста погубил еси, всеблаженне, / паки же ко страдальчеству мужески вооружился еси, / убив Копронима мечем веры, / и обоих ради венчался еси от Бога, / преподобномучениче Стефане приснопамятне.


Тропарь. Александру (Пересвету) и Андрею (Ослябе), Радонежским.
Воини Христолюбивии / страдальцы послушания прехвальнии / Александре дивный Пересвете и Андрее Ослябей именуемый / Сергия игумена благодатные наследницы, / Куликовской брани ратницы духовнии / вы бо змия агарянскаго победисте. / Но и нас своим заступлением не остависте, / телами в храме Рождества Богородицы почиваете, / душею в превышнем селении пребываете. / Молите за весь род русский православный, преподобнии сродницы наши.

 

Copyright © Николо-Иорданская Церковь 2007-2008